Араван жана Ноокат органикалык продукция өндүрүүчү аймак катары өнүктүрүлөт
Суу ресурстары, айыл чарба жана кайра иштетүү өнөр жайы министринин орун басары Рысгүл Акимжанова Ош облусунун Араван жана Ноокат райондоруна жумушчу сапар менен барып, бир катар айыл чарба жана кайра иштетүү ишканаларынын ишмердүүлүгү менен таанышты.
Министрликтин маалыматына ылайык, сапардын жүрүшүндө органикалык өндүрүштү өнүктүрүү, айыл чарба продукциясын кайра иштетүү, сактоо жана экспорттоо маселелери талкууланды.
Атап айтканда, "Ноокат Алмасы" кооперативинде интенсивдүү алма жана алча бактары, тамчылатып сугаруу системасы жана фермерлерди окутуучу борбор көрсөтүлдү. "Баглан" чарбасында тоолуу аймактарда бак өстүрүү жана органикалык стандарттарга өтүү мүмкүнчүлүктөрү каралды.
Ошондой эле "Азиз Ата" ишканасында 600 тоннага чейин продукция сактоого ылайыкталган логистикалык борбордун иши менен таанышып, мөмө-жемиштерди, анын ичинде Түркияга экспорттоо маселелери талкууланды. "Сонун Курут" ишканасында азык-түлүк үчүн пластикалык таңгактарды өндүрүү процесси көрсөтүлдү.
Сапардын жыйынтыгында Араван жана Ноокат райондорунда органикалык өндүрүштү өнүктүрүүгө чоң мүмкүнчүлүк бар экени белгиленди. Негизги максат — продукцияны өндүрүүдөн тартып сертификациялоо, кайра иштетүү, таңгактоо, сактоо жана экспорттоого чейинки бирдиктүү чынжырды түзүү.
