Кыргызстан менен АКШ темир жол долбоорлорун каржылоо мүмкүнчүлүктөрүн талкуулады
Финансы министри Руслан Суйналиев 3-сентябрда АКШнын Кыргызстандагы Атайын жана Ыйгарым укуктуу Элчиси Лесли Вигери жана Wabtec компаниясынын өкүлдөрү менен жолугушту.
Финансы министрлигинен билдиришкендей, жолугушууда кыргыз-америкалык финансылык-экономикалык кызматташтык, инфраструктуралык долбоорлорду ишке ашыруу жана аларды каржылоонун мүмкүн болгон механизмдери талкууланды.
Атап айтканда, Америка тарап Кыргызстандагы темир жол тармагында келечектүү долбоорлорду каржылоо боюнча бир катар сунуштарды жана алдын ала ыкмаларды сунуштады.
Руслан Суйналиев сунушталган механизмдер менен каржылоо шарттары кеңири жана дыкат иштеп чыгууну талап кыларын белгиледи. Анын айтымында, сунуштар Финансы министрлиги тарабынан белгиленген тартипте каралат.
Жолугушуунун жыйынтыгында тараптар диалогду улантууга жана өз ара пайдалуу кызматташтыктын багыттарын мындан ары өнүктүрүүгө кызыкдар экенин билдиришти.
