Салыктан патентке чейин: кызматтар банк тиркемелери аркылуу жеткиликтүү
Жарандар салыктык кызматтарды эми өздөрү колдонгон банктын мобилдик тиркемеси аркылуу ала алышат. Бул тууралуу Салык кызматынан билдиришти.
Мобилдик тиркеме аркылуу салыктарды жана камсыздандыруу төгүмдөрүн төлөөгө, салыктык карызды текшерүүгө жана электрондук патент алууга болот.
Мындан тышкары, жарандар жеке ишкер катары катталып, жеке ишкердин күбөлүгүн да электрондук түрдө ала алышат.
Бул үчүн банктын мобилдик тиркемесиндеги "Салыктар" же "Салыктык кызматтар" бөлүмүнө кирип, керектүү кызматты тандоо зарыл.
Жаңы мүмкүнчүлүк салыктык кызматтарды жарандар үчүн жеткиликтүү, тез жана ыңгайлуу алууга шарт түзөт.
