Чувашиядан Кыргызстанга асыл тукум мал алып келүү маселеси талкууланды
Бүгүн Айыл чарба министринин биринчи орун басары Илич Марсбек уулу Чуваш Республикасынын айыл чарба министри Андрей Макушев менен видеоконференция өткөрдү.
Жолугушууда Чувашиядан Кыргызстанга голштино-фриз породасындагы асыл тукум кунаажындарды жана бордоого арналган букаларды экспорттоо маселеси талкууланды. Тараптар ветеринардык талаптарды, логистиканы жана экспорттук көлөмдөрдү макулдашуу маселелерин карашты.
Ошондой эле Чувашиянын аймагында карантиндик-экспорттук аянтча куруу мүмкүнчүлүгү талкууланды.
Мындан тышкары, Кыргыз улуттук агрардык университети менен "Зоотехния", "Ветеринария" жана "Агрономия" багыттары боюнча кош дипломдук программаларды ишке ашыруу, студенттер жана окутуучулар үчүн академиялык мобилдүүлүк жана стажировка уюштуруу маселелери каралды.
Жыйынтыгында тараптар мал чарбачылыгы, ветеринария жана айыл чарба багытындагы билим берүү тармагында кызматташууну кеңейтүүгө кызыкдар экенин билдиришти.
