Ошто эки көмөк чордондо 16 МВАлык жаңы трансформаторлор орнотулду
Энергетика министрлигинин 2025–2026-жылдарга күз-кыш мезгилине даярдык боюнча тапшырмасынын негизинде “КУЭТ” ААКнын Ош электр тармактары 35/10 кВ “Речная” жана “Ош-7” көмөк чордондорундагы 10 МВА трансформаторлорду 16 МВА кубаттуулуктагы жаңы жабдууларга алмаштырды.
Министрликтин маалыматына ылайык, бул иш-аракеттер каскаддык метод менен жүргүзүлүп, шаарды туруктуу жана сапаттуу электр энергиясы менен камсыздоону күчөтүүгө багытталды.
Энергетиктердин айтымында, акыркы жылдары Ош шаарында калктын саны, жаңы турак жайлар жана өндүрүш объектилери көбөйүп, электр керектөөсү бир топ өскөн. 2024-жылдын 10 айында шаар 803 061 миң кВт/с энергия пайдаланса, 2025-жылдын ушул мезгилинде керектөө 897 928 миң кВт/с түздү — өткөн жылга салыштырмалуу 95 млн кВт/с көп.
Каскаддык алмаштыруу тартиби төмөнкүдөй жүрдү:
- “Ош-7”деги 10 МВА трансформатор → “Ош-5” көмөк чордонуна орнотулду.
- “Ош-5”тен чыккан 6 МВА трансформатор → “Ош-3000”ге өткөрүлдү.
- “Речная”дан алынган 10 МВА → “Западная”дагы 6,3 МВАнын ордуна.
- “Западная”дан чыккан 6,3 МВА → “Мырза-Аке”ге.
- “Мырза-Аке”деги 2,5 МВА → “Заргер”ге.
- “Заргер”ден алынган трансформатор ишкананын кампасына жиберилет.
Жаңы трансформаторлор жүктөмдү туура бөлүштүрүп, Ош шаары менен облусунун электр тармактарында кубаттуулукту жогорулатат.
