Суук аба ырайына байланыштуу энергетиктер күчөтүлгөн тартипте иштеп жатат
Жарыяланган штормдук эскертүүгө жана Кыргызстандын аймагында күтүлүп жаткан суук аба ырайынын шарттарына байланыштуу энергетиктер энергетикалык объектилердин ишин күчөтүлгөн тартипте көзөмөлдөөгө алышты. Бул тууралуу Бишкек шаардык мэриясынан билдиришти.
Авариялык-ремонттук запастар даярдалып, мүмкүн болгон бузулууларды тез арада жоюу схемалары иштелип чыкты.
"Кыргызстан УЭС" ААКтын маалыматына ылайык, оңдоо бригадалары, транспорт жана атайын техника жогорку даярдык абалына келтирилди. Оперативдик абал тынымсыз көзөмөлдөнүп, тиешелүү кызматтар үчүн суткалык кезекчилик графиктери бекитилди.
Абанын төмөн температурасы электр энергиясына болгон керектөөнү көбөйтөт, бул электр тармактык жабдууларга жүктү күчөтүшү мүмкүн. Энергетиктер керектөөчүлөрдү электр энергиясын үнөмдүү пайдаланууга жана бир нече энергияны көп талап кылган шаймандарды бир учурда күйгүзбөөгө чакырат.
Суроолор болсо “УЭТК” ААКка 105, мобилдик: 0772 001 209, 0556 001 209, WhatsApp: 0702 001 209 аркылуу кайрылсаңыз болот.
