Барпы айылында 1 МВт кубаттуулуктагы Күн электр станциясы курулат
"Элдик Банк" Жалал-Абад облусунун Сузак районунда күн электр станциясын куруу боюнча конкурс жарыялады. Долбоордун пландалган баасы 66 млн сомду түзөт, ал эми иштер ачык сатып алуу жол-жобосунун жыйынтыгы боюнча башталмакчы.
Сатып алуу тууралуу жарыя 2026-жылдын 27-январында жарыяланган. Подрядчылардан арыздар 2026-жылдын 4-февралына чейин кабыл алынат. Конкурс чектөөсүз форматта өткөрүлөт, ага резиденттер да, чет өлкө валютасында эсептөөлөрдү сунуштаган компаниялар да катыша алышат.
Кубаттуулугу 1 МВт болгон күн электр станциясы Сузак районунун Барпы айылында EPC-келишиминин негизинде — башкача айтканда, долбоорлоодон тартып пайдаланууга берүүгө чейин "ачкыч тапшыруу" шартында курулмакчы.
Техникалык тапшырмага ылайык, станция жылына болжол менен 1 680 МВт·саат электр энергиясын өндүрүшү керек. Анын ичинен өз муктаждыктарын эске алуу менен тармакка болжол менен 1 630 МВт·саат электр энергиясы берилет. Долбоордо кубаттуулугу 1 000 кВт·саат болгон энергияны топтоо системасын орнотуу да каралган.
Катышуучуларга финансылык жана укуктук тартипке байланыштуу талаптар коюлат. Компаниялар салыктык жана социалдык карыздарынын жок экенин ырастап, кызыкчылыктардын кагылышы жоктугу тууралуу маалымат берүүгө, ошондой эле 2023–2025-жылдар аралыгында окшош иштерди аткарган тажрыйбасын далилдөөгө тийиш. Мындан тышкары, толтурулган техникалык тапшырма жана коррупцияга каршы жобону камтыган ак ниеттүүлүк декларациясы талап кылынат.
Келишимдин финансылык шарттарына ылайык, аванс катары 50% төлөнөт, калган 50% аткарылган иштер кабыл алынгандан кийин берилет. Объектке кепилдик мөөнөтү 24 айды түзөт, ал эми подрядчы аныкталган кемчиликтерди 15 календардык күндүн ичинде жоюуга милдеттүү. Иштердин мөөнөтүн же кепилдик милдеттенмелерин бузган учурда ар бир кечиктирилген күн үчүн 0,1% өлчөмүндө айып пул каралган, бирок ал келишим баасынын 5%ынан ашпоого тийиш.
