Баткенде “Суу-Башы” көмөк чордону ишке берилди
Бүгүн энергетика министри Таалайбек Ибраевдин Баткен облусуна болгон жумушчу сапарынын алкагында Баткен шаарындагы 110/35/10 кВ "Суу-Башы" көмөк чордону расмий түрдө пайдаланууга берилди. Бул тууралуу /Энергетика министрлигинен билдиришти.
Ачылыш аземинде министр электр энергиясына болгон суроо-талап жыл сайын өсүп жатканын белгилеп, генерацияны жана кубаттуулукту жогорулатуу бүгүнкү күндүн негизги талабы экенин айтты. Анын айтымында, жаңы көмөк чордондор калкты туруктуу электр энергиясы менен камсыздоодо маанилүү роль ойнойт.
Жаңы көмөк чордондун долбоору "Кыргызстан улуттук электр тармагы" ААК менен Баткен шаардык мэриясынын биргелешкен аракетинде ишке ашырылып, жалпы 55 млн 758 миң сом каражат жумшалды. Курулуш иштери Баткен электр тармактар ишканасынын өз күчү менен аткарылган.
Көмөк чордондун ишке кириши менен Баткен шаарындагы "Жаңы-Достук" айылы, өнөр жай аймагы, "Баткен Сити" конушу, жаңы стадион, Чет-Булак кварталы, Бужум айылы жана 2 224 турак жай сапаттуу электр энергиясы менен камсыздалат.
Ошондой эле иш-чаранын алкагында Баткен электр тармактар ишканасына 4 даана автоунаа жана 1 экскаватор тапшырылып, бул авариялык кырдаалдарга ыкчам чара көрүүгө жана тейлөө сапатын жогорулатууга багытталганы белгиленди.
Ачылыш аземине министрлик өкүлдөрү, жергиликтүү бийлик, энергетиктер жана шаар тургундары катышты.
