Жалал-Абадда 65 жогорку чыңалуудагы подстанция оңдолот
2026-жылы Кыргызстандагы энергетикалык тутумдун ишенимдүүлүгүн жогорулатуу максатында Жалал-Абад облусунда 65 жогорку чыңалуудагы подстанцияда капиталдык оңдоо иштери жүргүзүлөт. Бул тууралуу Электр тармактарынын аймактык ишканасы (УЭТКнын филиалы) маалымдады.
Оңдоо иштери 35, 110, 220 жана 500 кВ чыңалуудагы объектилерди камтыйт. Жаңылоо иштери облустун дээрлик бардык райондорун жана шаарларын камтыйт. Тактап айтканда, Сузак районунда 14, Ноокен районунда 11, ал эми Токтогул районунда 9 подстанция капиталдык оңдоодон өткөрүлөт.
Мындан тышкары, ири көлөмдөгү иштер Майлуу-Суу, Кара-Көл, Таш-Көмүр, Манас шаарларында, ошондой эле Аксы, Ала-Бука, Чаткал жана Базар-Коргон райондорунда пландалган. Жалпысынан адистер 232 даана негизги электр жабдууларын калыбына келтирүүнү жана алмаштырууну көздөшүүдө. Алардын катарына күч трансформаторлору, өчүргүчтөр, ажыраткычтар, ашыкча чыңалууну чектегичтер жана ар кандай коммутациялык тутумдар кирет.
Мекемеде эскирген кубаттуулуктарды жаңылоо авариялык өчүрүүлөрдүн санын азайтып, электр энергиясын өткөрүү учурундагы жоготууларды кыскартууга жардам берет деп күтүшүүдө. Өзгөчө көңүл Таш-Көмүр шаарындагы жана Сузак районундагы 220 жана 500 кВ жогорку чыңалуудагы түйүндөргө бурулат, анткени бул объектилер өлкө аймагы боюнча электр энергиясын транзиттөөдө чечүүчү роль ойнойт.
