ЖК мектептерди куруу үчүн 50 млн долларлык кредитти жактырды
Жогорку Кеңештин депутаттары 29-январдагы жыйында Кыргыз Республикасы менен Сауд өнүктүрүү фондунун ортосундагы "Мамлекеттик мектептерди куруу" фаза-2" долбоору боюнча кредиттик макулдашууну үчүнчү окууда кабыл алышты. Бул тууралуу Жогорку Кеңештин басма сөз кызматынан билдиришти.
Долбоордун алкагында 187,5 млн сауд риалы же 50 млн АКШ долларына барабар кредит тартылат. Каражат 25 жылдык мөөнөткө берилип, анын 5 жылы жеңилдетилген мезгилди түзөт. Жылдык пайыздык чени — 1,5%.
Кредиттик каражаттар Бишкекте 5 жаңы мектепти жана 7 кошумча окуу корпусун, ошондой эле Чүй облусунда 2 жаңы мектепти курууга багытталат. Долбоор 2026–2029-жылдары ишке ашырылат.
Ошондой эле депутаттар ОПЕК фонду менен түзүлгөн таза суу жана санитария боюнча кредиттик макулдашууну экинчи окууда кабыл алышты. Долбоор Ош, Чүй жана Ысык-Көл облустарындагы 126 калктуу конушту таза суу менен камсыздоону көздөйт.
