Монголиядагы эң ири жез комбинаты Кыргызстанга металл казууга жардам бериши мүмкүн
Монголиянын "Эрдэнэт" жез-молибден комбинаты Кыргызстанда биргелешкен тоо-кен долбоорлорун ишке ашырууга тартылышы мүмкүн. Бул тууралуу президент Садыр Жапаровдун бүгүн, 10-июлда Монголиядагы "Эрдэнэт" заводуна болгон сапарынын алкагында айтылды.
Берилген маалыматка таянсак, мамлекет башчысына "Эрдэнэт" заводу Азиядагы жез-молибден рудасын казып алуу жана байытуу боюнча эң ири ишкана деп эсептелээри, жылына 40 млн тоннага жакын руданы кайра иштетип, 580 миң тоннанын тегерегинде жез концентратын жана 6 миң тонна молибден концентратын өндүрүп жаткандыгы жөнүндө маалымат берилди.
Заводго барганда кыргыз делегациясы заводдун техникалык-технологиялык кайра өзгөрүүлөрүн, тактап айтканда, Монголиянын "Эрдэнэт" кенинин рудасынан жезди алып чыгаруу боюнча алдыңкы технологияларды колдонуудагы тажрыйбасы менен таанышты.
Садыр Жапаров Кыргызстандын экономикасында Монголиянын экономикасындай эле тоо-кен тармагы да өзгөчө орунду ээлей турганын белгиледи.
"Мамлекет башчысы тоо-кен жана геологиялык багыттар боюнча адистерди даярдоо жана квалификациясын жогорулатуу, геология жана тоо-кен тармагынын ар кыл актуалдуу жана келечектүү багыттары боюнча биргелешкен илимий изилдөөлөр жана алмашуу жаатында кызматташууга кызыкдар экендигин билдирди", - дейт президенттин маалымат кызматы.
Ошондой эле Жапаров "Эрдэнэт" заводунун жетекчилигине Кыргызстандын компетенттүү түзүмдөрү менен биргеликте тараптар үчүн өз ара кызыкчылык жараткан багыттар боюнча өз ара аракеттенүү чөйрөлөрүн жакшылап ойлонуштурууну сунуштаганы айтылат.
