Депутаттар Россиядагы мекендештер менен жолугушту
ЖК төрагасынын орун басары Нурланбек Азыгалиев, депутаттар Медербек Алиев жана Сеидбек Атамбаев Оруссияда мекендештер менен жолугушту. Бул тууралуу ЖКнын маалымат кызматы билдирди.
Жолугушууда сөз сүйлөгөн Нурланбек Азыгалиев мекендештердин Кыргызстандын экономикасынын өнүгүшүнө, ошону менен бирге бөтөн жерде өз маданиятын, тилин сактап калууга кошкон чоң салымын белгиледи.
“Сиздер өлкөбүзгө каржылык жактан гана көмөк көрсөтпөстөн, улуттук иденттүүлүгүбүздү дүйнөгө таанытууда да жардам берип келесиздер. Чет жерде түзүлгөн диаспоралар, маданий борборлор жана коомдук бирикмелер бул жаатта жигердүү иш алып барууда”, - деди.
Жыйынтыгында эл өкүлдөрү мамлекеттин миграциялык саясатынын бир катар актуалдуу маселелерин белгилеп, мекендештерге ар тараптуу колдоо көрсөтүү мындан ары да уланаарын айтышты.
