Быйыл аралыктан шайлоого мүмкүн болот
Жакында боло турган КРнын ЖКнин депутаттарын шайлоого жарандардын активдүү катышуусу үчүн аралыктан шайлоо мүмкүнчүлүгү каралган. Жарандарынын конститутуиялык укуктарын камсыздоо максатында, быйыл 10-20-30 октябрда бүткүл Кыргыз Республикасы жана Россия Федерациясынын 5 шаарында тесттик режимде шайлоо өткөрүү пландаштырылган.
Мындай билдирүүнү КРнын Шайлоо жана референдум өткөрүү боюнча борбордук комиссиясынын мүчөсү Тынчтык Шайназаров бүгүн Бишкек шаарындагы “Айчүрөк” борбордук универсалдуу дүкөнүндө журналисттер үчүн шайлоонун алгачкы сынактык режимин тажрыйба жүзүндө көрсөтүп жатып, билдирди.
Анын айтымында, азыркы учурда өлкө боюнча 2492 шайлоо участкасы бар жана андан сырткары быйыл шайлоочулардын максималдуу шайлоого мүмкүнчүлүгүн камсыздоо үчүн аралыктан шайлоо режими киргизилип жатат.
Ага ылайык, ири соода борборлору, унаа базарларында, аэрапорт жана аскер бөлүктөрүндө дагы кошумча шайлоо участкаларын ачуу пландаштырылууда.
