Кыргызстанда 20 млн еврого бетон полотносун чыгаруучу завод курулат

Бүгүн айыл чарба министри Бакыт Төрөбаев бетон полотносун өндүрүүчү заводдун курулушуна капсула салуу аземине катышты. Бул тууралуу министриликтин басма сөз кызматынан билдиришти.

Заводдун курулушу Президент Садыр Жапаровдун тапшырмасы менен ишке ашырылууда. Долбоордун жалпы суммасы — 20 млн евро, ал кыргыз өкмөтү менен United Concrete Canvas компаниясынын өнөктөштүгүндө ишке ашырылып жатат.

«Жаңы завод курулгандан кийин, Кыргызстан бул материалды өз аймагында өндүрүүгө мүмкүнчүлүк алат, бул болсо импортко болгон көз карандылыкты азайтып, жумуш орундарын түзүп, экспорттук мүмкүнчүлүктөрдү кеңейтет. Өлкөдө 30 миң чакырымдан ашык каналдар бар, анын ичинен 19 миң чакырымы жабылбаган, ал эми 11 миң чакырымы капиталдык оңдоого муктаж. Биз алдыбызга амбициялуу максаттарды койдук – сугат системасын жаңыртуу, суу жоготууларын азайтуу жана дээрлик 37 миң гектар жаңы сугат жерлерин пайдаланууга берүү», — деп белгиледи Бакыт Торобаев.

Заводдун долбоордук кубаттуулугу жана иштөө режими:
Биринчи линия — жылына 7 млн м², эксплуатацияга берүү — 2027-жыл;
Экинчи линия — биринчи линия ишке киргенден кийин 5 жыл ичинде, ошондой эле 7 млн м²/жыл;

Толук кубаттуулукка жеткенде продукциянын бөлүштүрүлүшү: 60% — Кыргызстандын муктаждыктары үчүн, 40% — экспортко.

Мындан тышкары, заводдун ишке берилиши кеминде 50 жумуш орунун түзөт, алардын 90%ын Кыргыз Республикасынын жарандары ээлейт.

Аталган долбоор суу ресурстарын үнөмдөөгө, азык-түлүк коопсуздугун бекемдөөгө жана айыл чарба секторунда импортко болгон көз карандылыкты азайтууга чоң салым кошот.