Бишкекте турак жайлар “Дизайн-код” боюнча иретке келтирилет
Бишкек шаарында "Бишкек шаарынын дизайн-коду" эрежелерин ишке ашыруунун экинчи этабы башталды. Бул тууралуу Курулуш, архитектура жана турак жай-коммуналдык чарба министрлигине караштуу Шаар куруу жана архитектура департаменти кабарлады.
Экинчи этаптын алкагында турак жайлардын фасаддарына жана сырткы көрүнүшүнө көзөмөл күчөтүлөт. Тактап айтканда, батирлердин сырткы кондиционер блоктору, фасаддарга тартылган интернет жана электр зымдары, уруксатсыз айнектелген балкондор жана кошумча орнотулган конструкциялар боюнча иретке келтирүү иштери жүргүзүлөт.
Маалыматка ылайык, Дизайн-код боюнча интернет зымдары сыртка чыкпай, иреттүү жайгаштырылууга тийиш. Кондиционерлер терезенин жанына орнотулушу керек, ал эми балкондорго уруксатсыз кошумча курулуш жүргүзүүгө болбойт.
Бишкек шаардык архитектура башкармалыгы борбор калаа тургундарын жашаган үйлөрүн “Дизайн-коддун” талаптарына ылайык иретке келтирүүгө чакырат.
