Жалал-Абадда толук циклдүү индустриалдык балык чарбасы курулуп жатат
«Салих жана Ко» ЖЧКсы 11,8 миллион доллар инвестиция менен толук циклдүү индустриалдык балык кластерин түзүү боюнча долбоор баштады. Ага ылайык, Күрпсай суу сактагычында торлордо форель өстүрүлүп, Күмүш-Азиз айылында осетр чарбасы жана шоктук тоңдуруу линиялары менен балык кайра иштетүүчү завод курулат. Бул тууралуу Айыл чарба министрлигинен билдиришти.
Долбоор жылына 5 миң тонна форель жана 270 тонна осетр багууну, ошондой эле азык-түлүк икрасын өндүрүүнү пландаган.
«Айыл Банк» жана Мамлекеттик каржы холдинги долбоорду каржылоодо.
«Бул долбоор түштүк Кыргызстанда жаңы тармактын өнүгүүсүнө жол ачат. Биз заманбап технологияларды колдонуп, жаш адистерди окутуучу балыкчы мектебин түзөбүз», — деди «Салих жана Ко» ЖЧКсынын директору Урмат Мусаев.
"Долбоор ишке ашканда 40тан ашуун жаңы жумуш орундары түзүлүп, аймактын экономикасына салым кошот",-деп айтылат маалыматта.
