Бишкекте 126 мыйзамсыз жарнама демонтаждалып, 40 миң сом айып салынды
Биринчи Май районунда Бишкек шаарынын мэриясынын Жер пайдаланууну контролдоо башкармалыгы, муниципалдык инспекция жана Башкы архитектура жана курулуш башкармалыгы биргеликте Н.Исанов жана Тоголок Молдо көчөлөрүндө рейд өткөрдү. Бул тууралуу муниципалитеттен билдиришти.
Текшерүүнүн жыйынтыгында 126 мыйзамсыз жарнама конструкциясы демонтаждалып, КРнын Укук бузуулар жөнүндө кодексинин 107-беренесинин 3 жана 4-бөлүктөрүнө ылайык 8 протокол түзүлдү, жалпы айып пул 40 миң сомду түздү.
Мындан тышкары, Свердлов районунда Гоголь көчөсүнүн боюнда, №12 жана №20 турак жай имараттарынын жанындагы 7 жеңил конструкция демонтаждалууда.
Бул иш-чаралар шаардык мейкиндикти көрктөндүрүүгө, тургундардын коопсуздугун жана ыңгайлуу жашоо шарттарын камсыз кылууга багытталган. Борбор калаадагы бардык жарнамалар мыйзамга жооп бериши үчүн рейддер тынымсыз улантылат.
