Чоң-Алайда "Ак пейил" кооперативи 19 га кунарсыз жерди өздөштүрүүдө
Суу ресурстары, айыл чарба жана кайра иштетүү өнөр жайы министрлигинин өкүлдөрү Чоң-Алай районунун Чоң-Алай айыл аймагында жайгашкан "Ак пейил" айыл чарба кооперативинин ишмердүүлүгү менен жеринде таанышышты. Бул тууралуу министрликтен билдиришти.
Кооперативдин мүчөсү, айыл аксакалы Токтобеков Мураталы жүргүзүлүп жаткан иштер тууралуу кенен маалымат берди. Кооперативге 19 гектар кунарсыз жер аянты бөлүнүп берилген, азыр бул жерлерди өндүрүшкө пайдалуу аймакка айландыруу багытында иштер жүргүзүлүүдө.
Азыркы этапта жер толугу менен курчалып, тор зым менен тосулду. Жакынкы сезондо кооператив төмөнкү өсүмдүктөрдү эгүүнү пландап жатат: картошка, итмурун, чычырканак жана аймактын климаттык шарттарына ылайык башка айыл чарба өсүмдүктөрү.
Министрлик белгилегендей, кунарсыз жерлерди эффективдүү пайдалануу демилгеси Чоң-Алай районундагы айыл чарбасын өнүктүрүүгө өбөлгө түзүп, жергиликтүү калктын экономикалык мүмкүнчүлүктөрүн кеңейтүүгө салым кошот.
