Бишкекте концерттик программа менен коштолгон жарманке уюштурулат
Бишкек шаарында Суу ресурстары, айыл чарба жана кайра иштетүү өнөр жайы министрлигинин демилгеси менен арзан баадагы ири жарманке өтүп жатат. Иш-чара Т. Усубалиев атындагы аянтта, ошондой эле И. Раззаков жана Абдымомунов көчөлөрүнүн кесилишинде, Эркиндик бульвары боюнча (Биринчи Май району) уюштурулууда.
Жарманкеде жергиликтүү өндүрүүчүлөрдүн айыл чарба продукциялары, тамак-аш, кийим-кече жана күнүмдүк товарлар базар баасынан төмөн сунушталууда. Тандоонун көптүгү жана жеткиликтүү баалар шаар тургундарынын жогорку кызыгуусун жаратууда.
Бүгүн жарманке концерттик программа менен коштолоору күтүлүүдө. Ага белгилүү “Кызыл гвоздика” элдик ансамбли катышып, аскердик-патриоттук жана улуттук чыгармаларды аткарышат. Ансамблдин программасы жарманкенин маанайын көтөрүп, конокторго маданий атмосфера тартуулайт.
