Жаңы жылдык салтанаттарга шаар мэриясы чектөө киргизет

Жаңы жылдык иш-чараларды уюштурууда ашыкча чыгымдарды болтурбоо, ошондой эле коомдук тартипти камсыз кылуу максатында Бишкек шаарынын мэриясы "Жергиликтүү мамлекеттик администрация жана жергиликтүү өзүн өзү башкаруу органдары жөнүндө" КРнын Мыйзамына ылайык буйрук кабыл алды. Бул тууралуу шаардык мэриянын басма сөз кызматынан билдиришти.

Ага ылайык, Бишкек шаарынын мэриясынын борбордук аппаратына, ведомстволук жана аймактык бөлүмдөрүнө, ошондой эле муниципалдык ишканаларына жана мекемелерине Жаңы жылды майрамдоого арналган корпоративдик (көңүл ачуучу) иш-чараларды уюштурууга акча чогултууга тыюу салынат. Жылдын жыйынтыгы боюнча кызматкерлерди куттуктоо жана сыйлыктарды тапшыруу менен байланышкан расмий иш-чараларды гана өткөрүүгө уруксат берилет жана алар административдик имараттардын ичинде гана өткөрүлөт.

Бишкек шаарынын мэриясынын тутумуна кирген бардык уюмдардын жетекчилерине акча чогултууга жана "ишенип берилген" уюмдарда жаңы жылдык корпоративдик иш-чараларды өткөрүүгө жол бербөө көзөмөлүн камсыз кылуу тапшырылды.