25–27-ноябрь күндөрү Бишкек шаарынын айрым жолдорунда жол кыймылына чектөө киргизилет
Жаматтык коопсуздук жөнүндө келишим уюмунун (ЖККУ) Коопсуздук кеңешинин кезектеги сессиясынын жүрүшүнө байланыштуу 2025-жылдын 25–27-ноябрына чейин Бишкек шаарынын жана Чүй облусунун айрым жолдорунда жол кыймылына убактылуу чектөөлөр киргизилет.
ИИМ басма сөз кызматынан кабарлашкандай, чектөөлөр төмөнкү көчөлөрдө болот:
- Манас эл аралык аэропортунун магистралынан Бишкек шаарынын чек арасына чейин;
- Фучик көчөсү Бишкек шаарынын чек арасынан Чүй проспектисине чейин;
- Чүй проспектиси Фучик көчөсүнүн чыгышынан Манас проспектисине чейин;
- Манас жана Чыңгыз Айтматов проспектисинен түштүктү көздөй Ала-Арча мамлекеттик резиденциясына чейин;
- Ж.Абдрахманов, С.Ибраимов жана М.Фрунзе көчөлөрүнүн айрым бөлүктөрү.
Билдирүүгө караганда, жол тыгын азайтуу үчүн мектептер жана жогорку окуу жайлар убактылуу онлайн окутууга өтүшөт.
ИИМ өкүлдөрү жарандарды жогоруда көрсөтүлгөн жол жээктеринде унааларды калтырбоого, өтө зарыл болбосо, оор жүк ташуучу унааларды айдоодон баш тартууга жана жол кыймылынын эрежелерин так сактоого чакырат. Бул чектөөлөр кортеждердин өтүшү учурунда күчүндө болот.
Коомдук тартип менен коопсуздукту камсыздоого Бишкек жана Чүй гарнизонунун 4000ден ашык кызматкер тартылат.
