Эсептөө палатасы GSAI долбоорунун алгачкы этабын аяктады
Эсептөө палатасы 2023–2025-жылдарга карата ишке ашырылган Отчеттуулуктун глобалдык демилгесин колдоо (GSAI) долбоорунун биринчи этабын ийгиликтүү аяктады. Долбоор Польша Жогорку аудит органы, IDI уюму, Европа биримдиги жана Сауд Аравиясынын аудит органынын колдоосу менен ишке ашырылууда. Бул тууралуу ведомстводон билдиришти.
Эки жыл ичинде Эсептөө палатасы эл аралык ISSAI стандарттарына ылайык жаңы каржылык, шайкештик жана натыйжалуулук аудит методикаларын иштеп чыгып, ишке киргизди. Аудиторлор үчүн кеңири окуулар өткөрүлүп, алардын кесиптик даярдыгы жогорулатылды.
Ошондой эле мекеме аудит процессин санариптештирүү багытында стратегия кабыл алып, маалыматтарды талдоо жана IT-аудит боюнча жаңы ыкмаларды өздөштүрдү. Бул жараянда Польшанын жогорку аудит органынын тажрыйбасы пайдаланылды.
Институционалдык өнүктүрүү боюнча дагы бир маанилүү кадам — коммуникация стратегиясынын, жаңыланган ички эрежелердин жана аудиттин ачыктыгын камсыздаган Этикалык кодекстин кабыл алынышы болду.
Эсептөө палатасы GSAI долбоорунун кийинки этабын баштоого толук даяр экенин билдирди.
