Төрөбаев "Түп" картошка өстүрүү борборунун ишмердүүлүгү менен таанышты
Кечээ, Суу ресурстары, айыл чарба жана кайра иштетүү өнөр жайы министри Бакыт Төрөбаев Ысык-Көл облусунун Түп районунда жайгашкан “Түп” картошка өстүрүү борборуна барды. Министр борбордун ишмердүүлүгү, картошка сактоо инфраструктурасы жана техникалык базасы менен таанышты. Бул тууралуу министрликтин маалымат кызматынан билдиришти.
Борбордун негизги максаты – дыйкандарды сапаттуу жаңы үрөн менен камсыз кылуу жана картошканын уруктук материалдарын өндүрүү. Учурда уруктук картошка 2–3 градус температурадагы атайын муздаткыч кампаларда сакталууда, бул алардын сапатын узак убакытка чейин сактоого мүмкүндүк берет.
Министр Бакыт Төрөбаев борбордун лабораториялык жана өндүрүштүк мүмкүнчүлүктөрү менен таанышып, in vitro технологиясы аркылуу картошка өндүрүү жана жаңы сортторду чыгаруу планы тууралуу маалымат алды. Борбордун өкүлдөрү жергиликтүү фермерлерди сапаттуу уруктук материал менен камсыз кылуу демилгесин сунушташты.
Төрөбаев бул демилгелер урук чарбасын өнүктүрүүдө, импортко көз карандылыкты азайтууда жана айыл чарба өндүрүшүнүн туруктуу өсүшүн камсыздоодо маанилүү экенин белгиледи.
