Бишкектеги БУУ имаратына инженердик-динамикалык текшерүү жүргүзүлдү
Курулуш, архитектура жана турак жай-коммуналдык чарба министрлигине караштуу Жер титирөөгө туруктуу курулуш жана инженердик долбоорлоо мамлекеттик институту Бишкек шаарындагы Бириккен Улуттар Уюмунун административдик имаратын инженердик-динамикалык текшерүүдөн өткөрдү. Бул тууралуу ведомстводон билдиришти.
Текшерүү Чүй проспектиси 160 дарегинде жайгашкан 3 кабаттуу имараттын конструкцияларынын динамикалык параметрлерин аныктоо жана анын коопсуздук деңгээлин баалоо максатында жүргүзүлдү.
Адистер имараттын долбоордук жана техникалык документтерин карап чыгып, учурдагы конструкциялык абалын изилдеп, тийиштүү инженердик чиймелерди иштеп чыгышты. Ошондой эле объекттин сейсмикалык туруктуулугу боюнча талдоо жүргүзүлдү.
Текшерүүнүн жыйынтыгында институт имараттын техникалык абалы боюнча корутунду даярдап, аны мындан ары пайдалануу жана эксплуатациялоо боюнча сунуштарды иштеп чыгат.
