Кыргызстан менен Казакстанда жүктөрдү ташууда навигациялык пломбалар колдонулат
Мамлекеттик салык кызматы 2025-жылдын 1-декабрынан 2026-жылдын 15-январына чейин Кыргызстан менен Казакстан ортосундагы автомобилдик ташууларда навигациялык пломбаларды колдонуу боюнча пилоттук долбоорду ишке киргизүүдө. Пломбалар бардык товар түрлөрүн автотранспорт менен ташууда ыктыярдуу жана акысыз негизде колдонулат.
Салык кызматынын маалыматына ылайык, пломбалар Кыргызстандан Казакстанга жана Россияга, ошондой эле Казакстан жана Россиядан Кыргыз Республикасына келген жүктөрдө коюлат. Алар “Ак-Тилек-автожол” жана "Карасу" (Казакстан) өткөрүү пункттарында, ошондой эле транзит жана жеткирүү даректеринде алынат.
Пилоттук долбоордун максаты – товардын айлануусунун ачыктыгын жогорулатуу, көзөмөл жол-жоболорун тездетүү жана ЕАЭБ алкагында жүктөрдү көзөмөлдөө системасын киргизүүгө базардын катышуучуларын даярдоо.
Долбоорго катышуу үчүн Бишкек шаарындагы салык каттоосу боюнча тиешелүү аймактык салык органдарына кайрылуу керек. Бул долбоор 2025-жылдын августунда КР Салык кызматы менен Казакстан Мамлекеттик кирешелер комитетинин меморандумунун алкагында ишке ашырылып жатат.
