Пестициддерди жана агрохимикаттарды каттоо санариптештирилет
Суу ресурстары, айыл чарба жана кайра иштетүү өнөр жайы министрлиги пестициддерди жана агрохимикаттарды каттоо процессин санариптештирүүгө багытталган электрондук маалымат системасын түзүү иштери уланып жатканын маалымдады. Жаңы система колдонууга уруксат берилген каражаттар боюнча маалыматтарды бирдиктүү каталогго топтоп, алардын эсепке алынышын жана байкоого алынышын камсыздайт.
Электрондук каталог ФАО жана ГЭФтин "Пестициддердин жашоо циклин башкаруу жана ТОК-пестициддерин жок кылуу" долбоорунун алкагында иштелүүдө. Платформанын ишке киргизилиши мамлекеттик органдар, жеткирүүчүлөр жана айыл чарба өндүрүүчүлөр үчүн бирдиктүү маалыматтык мейкиндик түзүп, агрохимикаттарды көзөмөлдөө жана мониторинг системасын жаңылоого өбөлгө түзөт.
Министрликтин маалыматына ылайык, акыркы он жыл ичинде катталган бардык пестициддер жана агрохимикаттар маалымат базасына киргизилип, толук жана жаңыланган реестр түзүлүүдө. Электрондук системанын жүзөгө ашырылышы жеткирүүчүлөр үчүн документ жүгүртүү процессин жеңилдетип, каттоо жана текшерүү иштерин автоматташтырууга мүмкүндүк берет. Ошондой эле маалыматтын ачыктыгын жогорулатып, мамлекеттик адистердин ишин оптималдаштырууга, кагаз ишин кыскартууга жана пестициддердин жашоо циклін толук көзөмөлдөөгө жол ачат.
Жаңы платформанын ишке кириши агрохимикаттарды коопсуз колдонуу, мамлекеттик көзөмөлдү күчөтүү жана айыл чарба продукциясынын сапатын жогорулатуу боюнча маанилүү кадам болуп эсептелет.
