Аламүдүн районунун суу системаларын модернизациялоо маселелери талкууланды
Суу ресурстары, айыл чарба жана кайра иштетүү өнөр жайы министри Бакыт Төрөбаев Аламүдүн районунда активисттер, жергиликтүү кеңештердин депутаттары жана жергиликтүү өз алдынча башкаруу органдарынын өкүлдөрү менен жолукту. Бул тууралуу ведомстводон маалымдашты.
Жолугушууда айылдарды суу менен камсыздоо системалары боюнча зарыл болгон документтерди даярдоо иштерин тездетүү маселелери талкууланды. Анын негизги максаты заманбап суу менен камсыздоо системаларын киргизүү жана калкты сапаттуу, таза ичүүчү суу менен камсыз кылуу болуп саналат.
Төрөбаев документтерди өз убагында жана сапаттуу даярдоонун маанилүүлүгүн белгилеп, ичүүчү сууга жеткиликтүүлүк региондорду өнүктүрүү жана калктын жашоо сапатын жакшыртуу боюнча мамлекеттик саясаттын артыкчылыктуу багыттарынын бири экенин баса белгиледи.
Ичүүчү суу менен камсыздоону жана саркынды сууларды чыгарууну өнүктүрүү департаменти техникалык тапшырмаларды түзүүдө көмөк көрсөтөт.
Министр жергиликтүү айыл өкмөттөр тарабынан документтерди чогултуу процессин жөнөкөйлөтүү жана оптималдаштыруу боюнча конкреттүү тапшырмаларды берди.
