Эмгек министрлиги: 1 851 жаш адис стажировкадан өтүп, 72%ы жумушка орношкон
Күн мурун Эмгек, социалдык камсыздоо жана миграция министрлиги Дүйнөлүк банк менен биргеликте "Социалдык жардам жана эмгек рыногун чыңдоо" долбоорунун алкагында жаштар стажировкасына мониторинг жүргүздү.
Министрликтин маалыматына ылайык, мониторингдин жүрүшүндө "Элдик Банк" ААКнын "Мурас" филиалы жана Бишкек шаарындагы №98 кесиптик лицейге барып, жумушсуз жаштарды стажировкадан өткөрүү жана жумушка орноштуруу маселелери талкууланды.
Маалыматка караганда, пилоттук долбоор 2024-жылы өлкөнүн 30 аймагында ишке киргизилген. Бул мезгилде жаштардан 1 851 адам стажировкага жөнөтүлүп, алардын 72%ы жумушка орношкон. "Элдик Банк" стажировкада активдүү өнөктөш болуп, 78 жаш стажердин 65ин банкка ишке алган.
Дүйнөлүк банк жаштар арасындагы жумушсуздукту кыскартуу жана эмгек рыногуна чыгышына көмөктөшүүнүн маанисин белгиледи. Пилоттук долбоордун алкагында жаштар керектелген кесиптер боюнча билим алып, коммерциялык банктарда практикалык тажрыйба топтоп жатышат.
Долбоор мамлекет, бизнес жана эл аралык өнөктөштөрдүн натыйжалуу кызматташтыгын көрсөтүп, жаштардын жумушка орношуу мүмкүнчүлүгүн жакшыртууда.
