Бишкекте кар тазалоо иштерине 95 атайын техника тартылды
Жааган карга байланыштуу "Тазалык" муниципалдык ишканасы Бишкек шаарында кар тазалоо иштерин күчөттү. Бул тууралуу Бишкек шаардык мэриясынан билдиришти.
Маалыматка ылайык, "Тазалык" ишканасынын базасына Бишкек шаарынын мэри Айбек Жунушалиев барып, атайын техникалардын жана кызматкерлердин даярдыгын текшерди. Шаар башчысы коопсуздук эрежелерин так сактоону эскертип, көчөлөрдү жана тротуарларды активдүү тазалоону тапшырды.
Учурда жолдорго тайгаланууга каршы материалдар себилип, көчө-жол тармактары менен тротуарларды тазалоо иштери үзгүлтүксүз жүрүп жатат. Кар тазалоо иштери сутка бою жүргүзүлөт.
Иштерге жалпысынан 95 даана атайын техника тартылган. Алардын катарында 47 жол машиналары (КДМ), 3 фронталдык жүктөгүч, 3 лапалуу жүктөгүч, 3 универсалдуу коммуналдык машина (УКМ), тротуарларды тазалоо үчүн 34 трактор жана 5 даана Bobcat техникасы бар.
"Тазалык" муниципалдык ишканасы шаар тургундарын жолдордо этият болууга жана атайын техникалардын ишине тоскоолдук жаратпоо үчүн унааларды жол жээгине токтотпоого чакырат.
