Курулуш эрежелерин сактабаган “Зам-Зам билдингдин” лицензиясы токтотулду
Курулуш, архитектура жана турак жай-коммуналдык чарба министри Нурдан Орунтаевдин тапшырмасына ылайык, 17-январдан тарта курулуш объектилеринде мыйзам талаптарынын сакталышын, иштердин сапатын жана коопсуздугун текшерүү максатында рейддик иш-чаралар жүргүзүлүүдө.
Рейддин жүрүшүндө Бишкек шаарындагы Севастопольская көчөсү 8, Славян көчөсү 6/1 жана Фурманов көчөсү 13 даректеринде курулуп жаткан 14 кабаттуу турак жай комплексинде курулуш эрежелери жана техникалык коопсуздук талаптары сакталбаганы аныкталды. Ошондой эле курулуш-монтаждоо иштеринде бир катар курулуш ченемдери бузулган.
Мындан тышкары, подрядчы компания объекттин ичинде кеңсе жайларын уюштуруп, жарандарды кабыл алып келгендиги белгилүү болду. Аталган объект жогорку кооптуу өндүрүштүк объекттердин катарына киргендиктен, мындай аракеттер мыйзам бузуу катары бааланды.
Аныкталган мыйзам бузуулардын негизинде курулуш иштерин жүргүзүп жаткан “Зам-Зам билдинг” ЖЧКсына карата айып пул салуу жана лицензиясын токтотуу маселеси тиешелүү комиссиянын отурумунда каралды.
Комиссиянын 2026-жылдын 23-январындагы чечими менен “Зам-Зам билдинг” ЖЧКсынын лицензиясы 90 күнгө токтотулду.
