Майыптуулугу бар адамдар үчүн "YouTube-мектеп" долбоору ишке кирди
Эмгек, социалдык камсыздоо жана миграция министрлигине караштуу республикалык протездик-ортопедиялык буюмдар мекемеси коомдук "Мүмкүнчүлүк" бирикмеси менен биргеликте майыптуулугу бар адамдар үчүн "YouTube-мектеп" билим берүү долбоорун ишке ашырууда. Бул тууралуу ведомстводон билдиришти.
Долбоорго Реабилитациялык борбордо дарыланып, калыбына келтирүү курсунан өтүп жаткан жана социалдык адаптация процессиндеги майыптуулугу бар жарандар катышууда.
Окутуунун максаты — заманбап онлайн-платформалар аркылуу катышуучулардын санариптик көндүмдөрүн, медиасабаттуулугун жана өзүн-өзү ишке ашыруусун өнүктүрүү. Сабактарда YouTube менен иштөөнүн негиздери, видео тартуу жана монтаждоо, контент түзүү, канал жүргүзүү, социалдык тармактарда илгерилетүү жана жеке брендди өнүктүрүү үйрөтүлөт.
Учурда биринчи агымда 16 адам окуудан өтүүдө. Курстун жыйынтыгында катышуучуларга күбөлүк тапшырылат. Долбоор аяктаганга чейин 80 майыптуулугу бар адамды окутуу пландалууда.
