"Бейиш 2: Апама кат" тасмасын мыйзамсыз көчүрүп тараткандар 100 миң сом айып пулга жыгылышты
"Бейиш 2: Апама кат" аттуу көркөм тасманын жаратуучулары тасманын айрым үзүндүлөрү мыйзамсыз тартылып, социалдык тармактарга жарыяланган фактылар аныкталганын расмий түрдө билдиришти. Укук ээсинин юристтери мыйзам бузулган алгачкы учурларды документтештиришти.
"Автордук укук жана чектеш укуктар жөнүндө" мыйзамга ылайык, аудиовизуалдык чыгармага болгон өзгөчө укуктар толугу менен анын жаратуучуларына таандык. Тасманы же анын бөлүктөрүн расмий уруксатсыз көчүрүү, таратуу же интернетке жайгаштыруу мыйзамсыз деп эсептелет.
Укук коргоо органдары тасманын материалдарын мыйзамсыз жарыялаган эки адамдын өздүгүн аныкташты. Мыйзам бузгандар ар бири 50 миң сом өлчөмүндө айып пулга жыгылды.
Долбоордун авторлору мындан кийинки пираттык аракеттер атайылап жасалган кылмыш катары бааланарын эскертишет. Жаңы мыйзам бузуучулар тууралуу маалыматтар жарандык-укуктук, административдик жана кылмыш жоопкерчилигин колдонуу үчүн сот органдарына өткөрүлүп берилет. Айрым учурларда мыйзам эркинен ажыратууга чейин жаза карайт.
Тасманын жаратуучулары блогерлерди, ЖМК өкүлдөрүн жана катардагы колдонуучуларды башка адамдардын эмгегин урматтоого, интеллектуалдык менчикке карата мыйзамсыз аракеттерден алыс болууга чакырышат.
