Кыргызстанда көчөттөр импорту 2025-жылы 2 эсеге кыскарган

2024-жылы өлкөгө 13,3 миллиондон ашык көчөт импорттолсо, 2025-жылы бул көрсөткүч 6,86 миллионду түзүп, мурунку жылга салыштырмалуу кыйла азайган. Көчөттөрдүн экспорту да кыскарганын Суу ресурстары, айыл чарба жана кайра иштетүү өнөр жайы министрлиги билдирди.

Ведомствонун маалыматына ылайык, министрликтин Химиялаштыруу, өсүмдүктөрдү коргоо жана карантин департаменти республика аймагына ташылып келинген көчөттөргө туруктуу фитосанитардык көзөмөл жүргүзөт.

Көчөттөр фитосанитардык коркунучу жогору продукцияга кирет жана алар милдеттүү түрдө толук карантиндик фитосанитардык көзөмөлдөн өткөрүлөт. Биринчи кезекте фитосанитардык сертификаттын бар-жогу жана коштоочу документтердин талаптарга шайкештиги текшерилет. Андан кийин карантиндик зыяндуу организмдерди аныктоо үчүн лабораториялык үлгүлөр алынат. Зарыл болгон учурларда зыянсыздандыруу иштери жүргүзүлөт.

Лабораториялык көзөмөлдүн алкагында 2024-жылы 8 миңден ашык экспертиза жүргүзүлсө, 2025-жылы 3 миңден ашуун текшерүү өткөрүлгөн. Өткөн жылы зыянсыздандыруунун көлөмү 156 миң куб метрди түзүп, 2024-жылдагы көрсөткүчтөрдөн кыйла жогору болгон.

Мындан тышкары, көчөттөрдү импорттоо үчүн Кыргызстан аймагына сортторду жана гибриддерди алып кирүүгө укук берген уруксат кагазынын болушу талап кылынат.

Ошондой эле өлкөдө пестициддердин жана агрохимикаттардын жүгүртүлүшүнө катуу көзөмөл жүргүзүлөт. Алар милдеттүү түрдө мамлекеттик каттоодон өтүшү керек, ал эми каттоодон өтпөгөн химиялык каражаттарды алып кирүүгө тыюу салынган.