Кыргызстан Европа парламенти менен визалык жеңилдетүүнү талкуулады
Бишкекте Кыргыз Республикасынын Жогорку Кеңеши менен Европа парламентинин ортосундагы парламенттер аралык кызматташтык комитетинин 18-отуруму өткөрүлдү.
Жыйынга Жогорку Кеңештин Төрагасынын орун басары Жылдыз Таалайбек кызы жана депутаттар Салтанат Аманова, Махабат Мавлянова, Алтынбек Кылычбаев, Исманали Жороев катышты. Европа парламентинин делегациясын Джузи Принчи жетектеп, курамында депутаттар Свен Симон, Тьерри Мариани жана Кристиан Вигенин болду.
Жыйындын жүрүшүндө тараптар Кыргызстан менен Европа Бирлигинин ортосундагы кызматташтыктын учурдагы абалы жана келечеги, соода-экономикалык байланыштар, инвестициялык климат, билим берүү жана гуманитардык байланыштарды талкуулашты. Визалык режимди жеңилдетүү маселеси дагы өзгөчө көңүл борборунда болду.
Салтанат Аманова парламенттер аралык кызматташтык ишенимди бекемдөөнүн маанилүү механизми экенин белгилеп, диалогду мындан ары да өнүктүрүүгө кызыкдар экенин айтты. Жыйынтыгында тараптар кызматташтыкты активдештирүүгө жана эки тараптуу диалогду тереңдетүүгө даяр экенин ырасташты.
