Газга кошулуу үчүн насыянын үстөгү 3%га чейин төмөндөтүлдү
Министрлер Кабинетинин 2025-жылдын 28-апрелиндеги №349 тескемесине ылайык, калкты газ түтүктөрүнө кошууга жана газ менен жылытуу жабдууларын сатып алууга берилүүчү насыянын пайыздык чени жылдык 8%дан 3%га чейин төмөндөтүлдү. Жеңилдетилген каржылоо программасынын алкагында жарандарга 150 000 сомго чейин насыя берүү каралган.
Маалыматка ылайык, 2025-жылы аталган программанын негизинде 146 жаранга жалпысынан 18 млн 82 миң сом өлчөмүндө жеңилдетилген насыя берилген.
Өлкөнүн калктуу конуштарын газдаштыруу багытында Газпром Кыргызстан компаниясы тарабынан жүргүзүлгөн иштердин алкагында газ тармагын өнүктүрүүгө 33 млрд сом инвестиция салынды. Натыйжада, 2014-жылга салыштырмалуу 2025-жылы газификациянын деңгээли 22 пайыздан 44%га чейин өстү. Абоненттердин саны 444 миңге жетти.
Бишкек шаарында бүгүнкү күндө 54 калктуу конуш газдаштырылып, 51 миңден ашык абонент газга кошулган. Алардын ичинен 36 миң үйдүн отканалары газ менен жылытууга өткөрүлгөн. Конуштарды газдаштыруунун натыйжасында көмүрдүн орточо керектөөсү жылына 100 миң тоннадан ашуун кыскарды.
Жалпысынан 2025-жылы Бишкек шаары боюнча 5 миңге жакын үй газ менен жылытууну колдоно баштаган. Ошол эле учурда 97 317 үй дагы эле көмүр жана башка отун түрлөрүн пайдаланууну улантууда.
Газдаштыруу иштери экологиялык абалды жакшыртууга, калктын жашоо шартын көтөрүүгө жана абанын булгануусун азайтууга багытталган маанилүү кадам болуп саналат.
Каржылоо республикалык бюджеттин эсебинен Айыл Банк жана Элдик Банк аркылуу жүргүзүлөт. Газ казандарын орнотуу жана газ түтүгүнө туташуу үчүн жеңилдетилген насыя алуу максатында жарандар аталган банктарга кайрылса болот.
