Жалал-Абадда 11,8 млн долларлык балык чарба комплекси курулууда

Суу ресурстары, айыл чарба жана кайра иштетүү өнөр жайы министри Эрлист Акунбеков Жалал-Абад облусундагы Салих и Ко ишканасына иш сапары менен барып, балык чарба долбоорунун жүрүшү менен таанышты. Бул тууралуу ведомстводон билдиришти.

Сапардын жүрүшүндө министрлик тарабынан балык чарбасын өнүктүрүү багытында ар тараптуу колдоо көрсөтүлөрү белгиленди. Ишкананын базасында фермерлерди окутуу жана тажрыйба алмашуу борборун түзүү пландалууда. Ал ишке киргенден кийин Балык чарба департаменти менен биргеликте фермерлер үчүн семинарлар жана окуулар уюштурулуп турат.

Маалыматка ылайык, "Салих и Ко" компаниясы балык өстүрүүдөн тартып кайра иштетүү жана экспортко чыгарууга чейинки толук өндүрүш циклин камтыган заманбап балык кластерин түзүү долбоорун ишке ашырууда.

Долбоордун жалпы баасы 11,8 млн АКШ долларын түзөт. Анын ичинен 6,8 млн доллар компаниянын өз каражаты, ал эми 5 млн доллар жеңилдетилген насыя катары Айыл Банк тарабынан бөлүнгөн.

Долбоордун алкагында Күрпсай суу сактагычында 23 гектар аянтта 100 садоктон турган форель балык чарбасы курулууда. Бул жерде 2030-жылга чейин жылына 5 миң тоннага чейин форель өстүрүү пландалууда.

Ошондой эле Сузак районундагы Күмүш-Азиз айылында 8 гектар аянттагы осетр балык чарбасы түзүлүп, жылына 270 тонна балык жана 1 тонна азыктык кара икра өндүрүү каралган.

Мындан тышкары, аянты 2100 чарчы метр болгон балыкты кайра иштетүүчү заводдун курулушу жүрүп жатат. Анын жылдык өндүрүш кубаттуулугу 5 миң тоннага чейин жетет.

Долбоор ишке ашкандан кийин 40 жаңы жумуш орду түзүлүп, кийинки этаптарда кызматкерлердин саны дагы көбөйтүлүшү күтүлүүдө. Ошондой эле 5 жыл ичинде 1,35 млрд сомдон ашык салык түшүүсү пландалууда.

Белгиленгендей, быйыл апрель айында балыктарды кое берүү пландалып, алар болжол менен бир жарым жылдын ичинде 5-6 кг салмакка чейин жетет.