Араванда картошка айдоонун заманбап техникасы колдонулууда
Ош облусунун Араван районундагы "Бирлик" үрөн чарбасы картошка эгүүдө заманбап техниканы колдонуп жатат. Бул тууралуу Суу ресурстары, айыл чарба жана кайра иштетүү өнөр жайы министрлиги билдирди.
Маалыматка ылайык, жаңы техника талаада бир эле учурда беш түрдүү ишти аткара алат. Бул дыйкандардын эмгегин жеңилдетип, талаа иштерин ыкчам жана натыйжалуу жүргүзүүгө шарт түзөт.
Техниканын негизги мүмкүнчүлүктөрү төмөнкүлөр:
- отоо чөптөргө каршы дары чачып, түшүмдүн сапатын жогорулатат;
- картошканы 90 сантиметр аралыкта бир нече жөөккө эгип, өндүрүмдүүлүктү арттырат;
- тамчылатып сугаруу системасына ылайык шланг орнотуп, сууну үнөмдөөгө шарт түзөт;
- жер семирткичтерди атайын себет аркылуу чачып, топурактын сапатын жакшыртат;
- полиэтилен пленкасын жаап, топуракты коргоп, нымдуулукту сактайт.
Министрликтен билдиришкендей, эгер быйыл жаңы техника өзүнүн натыйжалуулугун көрсөтсө, келерки жылы бул технология башка дыйкандарга да сунушталат.
"Бирлик" үрөн чарбасы заманбап технологияларды колдонуу аркылуу айыл чарба өндүрүшүн өнүктүрүүгө, жергиликтүү дыйкандардын эмгегин жеңилдетүүгө жана өлкөдө айыл чарба тармагындагы натыйжалуулукту жогорулатууга багыт алып жатат.
