Бишкектеги №39 мектеп реконструкциядан кийин пайдаланууга берилди
Бүгүн Бишкек шаарындагы №39 орто мектеп ири реконструкция жана капиталдык оңдоодон кийин пайдаланууга берилди. Бул тууралуу Курулуш министрлигинен билдиришти.
Иш-чарага Курулуш, архитектура жана турак жай-коммуналдык чарба министри Нурдан Орунтаев, Бишкек шаарынын мэри Айбек Джунушалиев, жергиликтүү өз алдынча башкаруу органдарынын өкүлдөрү, мугалимдер жана окуучулар катышты.
1200 окуучуга ылайыкташкан мектепте үч кабаттуу окуу корпусу, жыйындар залы, китепкана жана спорт залы толугу менен жаңыланды. Жалпы аянты 6 580 чарчы метр болгон имаратта жылытуу, суу менен камсыздоо жана жарыктандыруу системалары жаңыртылып, окуучулар үчүн ыңгайлуу шарттар түзүлдү.
Мектептин сырткы аймагында да инфраструктура жакшыртылды. Бул жерде футбол, волейбол жана баскетбол аянтчалары курулуп, балдар жана чоңдор үчүн спорттук зоналар уюштурулду.
Долбоор Курулуш, архитектура жана турак жай-коммуналдык чарба министрлигине караштуу "Кыргызкурулуш" мамлекеттик ишканасы тарабынан ишке ашырылды.
Белгилей кетсек, аталган мектептин биринчи окуу корпусу 1961-жылы, экинчиси 1984-жылы курулган. Бул имараттар ошол убакыттан бери мындай масштабдагы оңдоодон биринчи жолу өткөрүлдү.
