Ауэзов көчөсү иретке келтирилет: мэриянын жаңы планы кандай?

Бишкек шаарында Ауэзов көчөсүндө өткөн көчмө жыйында аймакты көрктөндүрүү жана тартипке келтирүү боюнча бир катар чечимдер кабыл алынды. Бул тууралуу Бишкек шаарынын мэриясынан билдиришти.

Борбор калаада мэрдин орун басары Рамиз Алиевдин катышуусунда Анкара көчөсүнөн Жибек-Жолу проспектисине чейинки Ауэзов көчөсүндө көчмө жыйын өткөрүлдү.

Жыйындын жүрүшүндө аймактын санитардык абалы, жашылдандыруу жана көрктөндүрүү иштеринин жүрүшү текшерилип, мыйзамсыз объектилерди демонтаждоо маселелерине өзгөчө көңүл бурулду.

Иш-чарага мэриянын тиешелүү кызматтары, райондук администрациялар жана муниципалдык ишканалардын өкүлдөрү катышты.

Жыйындын жыйынтыгында бир катар чечимдер кабыл алынды. Алардын катарында Ауэзов көчөсүнүн айрым тилкелеринде гүл бакчаларды уюштуруу, дарактарды отургузуу, мыйзамсыз курулуштарды демонтаждоо, таштанды сорттоо пункттарын түзүү, эски электр тирөөчтөрүн алуу, тротуарларды жаңылоо жана көчөлөрдү жарыктандыруу каралган.

Бул чаралар шаардык инфраструктураны жакшыртууга, коопсуздукту жогорулатууга жана тургундар үчүн ыңгайлуу шарттарды түзүүгө багытталган.