Кыргызстанда ун өндүрүшү 50% гана кубаттуулукта иштеп жатат
Бүгүн Суу ресурстары, айыл чарба жана кайра иштетүү өнөр жайы министри Эрлист Акунбеков "Кыргыз Республикасынын ун өндүрүүчүлөр ассоциациясынын" өкүлдөрүнүн катышуусунда кеңешме өттү. Бул тууралуу ведомстводон билдиришти.
Жыйынга мамлекеттик органдардын жана Ун өндүрүүчүлөр ассоциациясынын өкүлдөрү катышып, азык-түлүк коопсуздугу, баалардын туруктуулугу жана тармактын туруктуу иштеши маселелери каралды.
Кеңешменин жүрүшүндө Казакстан менен буудай жана ун жеткирүү боюнча 2026-жылга узак мөөнөттүү келишимдерди түзүү, бааларды жана көлөмдөрдү алдын ала бекитүү, ошондой эле транзит маселелери талкууланды. Ошондой эле күйүүчү-майлоочу майлардын кымбатташы жана геосаясий жагдайлардын рынокко тийгизген таасири белгиленди.
Жыйында мыйзамсыз ун алып кирүү жана чийки заттын жетишсиздиги маселелери көтөрүлүп, учурда ата мекендик ишканалар өз кубаттуулугунун 50%ын гана колдонуп жатканы айтылды.
Мындан тышкары, өндүрүш үчүн чийки зат базасын жергиликтүү деңгээлде өнүктүрүү маселеси талкууланды. Министр казак тарап менен сүйлөшүүлөр жүрүп жатканын жана көтөрүлгөн көйгөйлөр жакын арада чечилерин билдирди.
Жыйынтыгында мамлекеттик органдарга буудай жеткирүү жана транзит маселелерин жөнгө салуу, ун өндүрүү тармагын колдоо, буудай сактоочу кампаларды куруу, ошондой эле мыйзамсыз продукциянын киришине бөгөт коюу боюнча чараларды күчөтүү тапшырылды.
