Мэрия: Мектепке жасалма каттоо мыйзам бузуу болуп саналат
Бишкек шаарынын мэриясынын Билим берүү департаменти ата-энелерди балдарын белгилүү мектептерге киргизүү максатында жасалма каттоого (пропискага) жол бербөөгө чакырат.
Маалыматка ылайык, мектептен орун алуу үчүн каттоону сатып алуу же жасалма түрдө уюштуруу фактылары текшерүүгө алынат. Өткөн окуу жылында бир дарек боюнча бир нече үй-бүлө катталган учурлар аныкталган.
Мындай мыйзам бузуу үчүн жоопкерчилик каралган.
Департамент ошондой эле бардык мектептерде окуу программалары мамлекеттик стандарттарга ылайык бирдей экенин эскертет. Бул жагынан алганда, баланын кайсы мектепте окуганы эмес, анын коопсуздугу, саламаттыгы жана ыңгайлуулугу маанилүү.
Ушуга байланыштуу ата-энелерге балдарын жашаган жерине жакын жайгашкан мектептерге берүү сунушталат.
