Бишкекте сейил бактарда соода объекттерин жайгаштыруунун тартиби түшүндүрүлдү
Бишкек шаарында сейил бактарда жана аянттарда соода жана көңүл ачуу объекттерин жайгаштыруу муниципалдык мүлктү башкаруу боюнча мыйзамдарга ылайык жүргүзүлөт. Бул тууралуу муниципалитеттен билдиришти.
Тиешелүү жобого ылайык, аянты 5 чарчы метрге чейинки стационардык эмес жана көчмө объекттер үчүн орундар түз берүү жолу менен берилет. Жайгаштыруу бекитилген чиймеге (схемага) негизделип, анда объекттердин түрү, саны жана так жайгашкан жери көрсөтүлөт.
Бул чиймелер жашыл аймактарды сактоо талаптарын жана шаардык көрктөндүрүү нормаларын эске алуу менен иштелип чыгып, жылына бир жолу атайын комиссия тарабынан бекитилет.
Белгиленген эрежелердин аткарылышы райондук администрациялар тарабынан көзөмөлдөнүп, мыйзам бузуулар аныкталса, тиешелүү чаралар көрүлөт.
Муниципалитет ишкерлерди талаптарды сактоого жана объекттерди белгиленген жерлерде гана жайгаштырууга чакырат.
