KOICAнын мал чарбасын өнүктүрүү боюнча долбоорунун жыйынтыгы чыгарылды
Бүгүн Суу ресурстары, айыл чарба жана кайра иштетүү өнөр жайы министринин орун басары Асел Кененбаеванын төрагалыгы алдында Кореянын эл аралык кызматташтык агенттигинин (KOICA) жана Кыргыз мал чарба жана жайыт илимий-изилдөө институтунун өкүлдөрүнүн катышуусунда жыйынтыктоочу кеңешме өттү.
Министрликтин маалыматына ылайык, иш-чара “Кыргыз Республикасында бодо малдын породасын генетикалык жакшыртуу жана малды жасалма уруктандыруу боюнча адистердин потенциалын жогорулатуу – PMC” долбоорунун алкагында уюштурулуп, Мал чарба жана жайыт институтун өнүктүрүүнүн Комплекстүү планы тааныштырылды.
Долбоордун негизги максаты — жергиликтүү шартка ыңгайлашкан бодо малдын породасын жакшыртуу системасын түзүү, жасалма уруктандыруу боюнча адистердин мүмкүнчүлүктөрүн күчөтүү, ошондой эле геномдук лабораторияны, урук өндүрүү лабораториясын жана Кесиптик окутуу борборун түзүү болуп саналат.
Кеңешменин жүрүшүндө Комплекстүү өнүктүрүү планынын негизги багыттары жана аны ишке ашыруу этаптары талкууланды. Ошондой эле долбоордун жетишкендиктери, алдыдагы пландары жана анын туруктуулугун камсыз кылуу боюнча чаралар тууралуу маалымат алмашуу болду.
