Ошто жасалма VIN-код менен атайын техника сатуу схемасы аныкталды
Ош облусунда идентификациялык маалыматтары өзгөртүлгөн атайын техникаларды мыйзамсыз сатуу схемасы аныкталды. Бул тууралуу Улуттук коопсуздук мамлекеттик комитетинен билдиришти.
Маалыматка ылайык, чет өлкөдөн алып келинген атайын техникалардын заводдук тактайчалары, VIN-номерлери жана башка идентификациялык белгилери алмаштырылып, чыгарылган жылы жашырылган. Натыйжада алар жаңы техника катары кымбат баада сатылып келген.
Тергөө-ыкчам иш-чараларынын жүрүшүндө бул схемага тиешеси бар чет өлкөлүк Л.Л. аттуу жаран кармалып, УКМКнын убактылуу кармоочу жайына киргизилди.
Атайын кызматтын маалыматына караганда, мыйзамсыз аракеттер бажы төлөмдөрүнөн качуу жана материалдык пайда табуу максатында уюштурулган.
Учурда бул факты боюнча тергөө иштери уланууда.
