Чүйдө жайыттарды тебелеген айдоочуларга 93 миң сом айып салынды
Чүй облусунун Кашка-Суу айылындагы Ак-Таш жайытында унаалар жана эндуро мотоциклдер менен жашыл аймактарды тепселеп, жаратылышка зыян келтиргендерге каршы рейд өткөрүлдү.
Экологиялык жана техникалык көзөмөл кызматынын маалыматына ылайык, текшерүүнүн жыйынтыгында мыйзам бузган айдоочуларга карата 17 протокол түзүлдү. Жаратылышка зыян келтиргендерге жалпысынан 93 миң 500 сом өлчөмүндө айып пул салынды.
Ошондой эле жашыл аймакка мыйзамсыз кирген унаалар аймактан чыгарылып, айдоочуларга түшүндүрүү иштери жүргүзүлдү.
Белгиленгендей, бул иш-чара Министрлер Кабинетинин 2026-жылдын 11-майындагы айрым аймактарда мототранспорт каражаттарын колдонууну чектөө тууралуу токтомунун негизинде жүргүзүлүүдө. Учурда мындай рейддер өлкө аймагында туруктуу негизде өткөрүлүп жатат.
Адистер жарандарды жаратылышка аяр мамиле кылууга жана экологиялык талаптарды сактоого чакырышты.
