Бишкекте фасадды бузган мыйзамсыз балкондор алынып жатат
Бишкек шаарында райондук администрациялар тарабынан мыйзамсыз курулган балкондорду демонтаждоо иштери улантылууда.
Муниципалитеттен билдиргендей, демонтаж жүргүзүлүп жаткан объектилер тандалма негизде аныкталган эмес. Буга чейин тиешелүү кызматтар тарабынан көчмө текшерүүлөр уюштурулуп, мыйзам бузуу фактылары толугу менен аныкталган.
Мыйзам талаптарын бузуу менен курулган объектилердин ээлерине белгиленген тартипте эскертмелер жана көрсөтмөлөр тапшырылган. Айрым учурларда батир ээлери жашаган жеринде болбогондуктан, алардын катышуусусуз демонтаж жүргүзүү мүмкүн эместигине байланыштуу иштер убактылуу жылдырылган.
Шаар бийлиги мурда көрсөтмө берилген бардык мыйзамсыз курулган балкондор белгиленген тартипте жана колдонуудагы мыйзамдардын негизинде милдеттүү түрдө демонтаждала турганын маалымдайт.
Эске салсак, Бишкек шаардык кеңешинин 2024-жылдын 14-майындагы №134 токтомуна ылайык, балкондорду жана лоджияларды уруксатсыз айнектөөгө, алардын көлөмүн жана түсүн өзгөртүүгө, жаңы балкондорду курууга же фасаддын архитектуралык көрүнүшүн өзгөрткөн башка иштерди жүргүзүүгө жол берилбейт.
Ошондой эле эшик жана терезе көзөнөктөрүнүн архитектуралык формасын өзгөртүү, тосмолордун түсүн жана көрүнүшүн өз алдынча алмаштыруу, балкондорду уруксатсыз реконструкциялоо жана фасаддын айрым бөлүктөрүн өз алдынча сырдоо же каптоо мыйзам бузуу болуп саналат.
