Илбирсти аткандарга 2 млн сом айып пул салынат
Кыргызстанда Кызыл китепке кирген жапайы жаныбарларды жок кылгандарга ири өлчөмдөгү айып пулдар каралган. Жаратылыш ресурстары, экология жана техникалык көзөмөл министрлиги тарабынан жаратылышты коргоо багытындагы көзөмөл күчөтүлүп, мыйзам бузууларды аныктоо боюнча рейддер үзгүлтүксүз жүргүзүлүүдө.
Министрликтин маалыматына ылайык, сейрек кездешүүчү жаныбарларды аткандар төмөнкү өлчөмдөгү айыптарды төлөшөт:
• Илбирс үчүн — 2 000 000 сом;
• Аркар-кулжа, марал, күрөң аюу жана жейрен үчүн — 1 500 000 сом;
• Кызыл карышкыр, мадыл жана сүлөөсүн үчүн — 50 000 сом.
Белгилей кетсек, жакында Суусамыр өрөөнүндө кийик аткан браконьер кармалып, анын үстүнөн тиешелүү тергөө иштери башталган.
Министрлик жарандарды жаратылышты коргоо боюнча мыйзамдардын талаптарын сактоого чакырат. Ошондой эле жапайы жаныбарларга байланыштуу мыйзам бузуулар тууралуу 108 ишеним телефону аркылуу маалымат берүүгө болот.
Жаратылышты коргоо — жалпыбыздын милдетибиз.
