Кара-Сууда 225 үй-бүлөгө ипотекалык батирлер тапшырылды
Кара-Суу районунун Жаңы-Арык айылында жайгашкан "Мурас" шаарчасында алгачкы ипотекалык батирлердин ачкычтарын тапшыруу аземи болуп өттү. Иш-чарага Президент Садыр Жапаров онлайн форматта катышты.
Президенттин Ош облусундагы ыйгарым укуктуу өкүлчүлүгүнүн маалыматына ылайык, бул этапта беш кабаттуу беш блок үй пайдаланууга берилип, жалпысынан 225 батир өз ээлерине тапшырылды.
Анын ичинде:
• 50 бир бөлмөлүү батир;
• 125 эки бөлмөлүү батир;
• 50 үч бөлмөлүү батир.
Заманбап турак жай комплексинде жашоочулар үчүн бардык шарттар каралган. Тактап айтканда, 830 чарчы метр аянтты ээлеген балдар аянтчасы, 74 орундуу жер үстүндөгү унаа токтотуучу жай, футбол аянтчасы жана спорт комплекси курулган.
Мындан сырткары, учурда шаарчанын аймагындагы 1,95 гектар жер тилкесинде дагы бир катар көп кабаттуу турак үйлөрдүн курулушу активдүү уланууда.
"Мурас" шаарчасындагы турак жай долбоору жарандарды жеткиликтүү жана заманбап турак жай менен камсыздоого багытталган ири мамлекеттик программалардын бири болуп саналат.
