Нурдан Орунтаев “Royal Central Park” комплексинин курулушун текшерди
Күн мурун курулуш, архитектура жана турак жай-коммуналдык чарба министри Нурдан Орунтаев Бишкек шаарында курулуп жаткан “Royal Central Park” көп функционалдуу турак жай комплексине барып, курулуш иштеринин жүрүшү менен жеринде таанышты.
Иш сапардын жүрүшүндө министрге долбоордун учурдагы абалы, аткарылып жаткан иштер жана курулуштун кийинки этаптары тууралуу кеңири маалымат берилди.
Бүгүнкү күндө долбоордун биринчи этабына кирген беш блок боюнча жер казуу иштери толугу менен аяктады. Алардын ичинен эки блокто фундаменттик плитанын алдындагы даярдоо жана бетон куюу иштери бүткөрүлүп, монолиттик конструкцияларды куруу иштери уланууда. Ошондой эле аймакты көрктөндүрүү жана инженердик инфраструктураны даярдоо боюнча иштер жүргүзүлүүдө.
Долбоорго ылайык, комплексте жалпысынан 39 блок жана 26 миң батир курулат. Биринчи этапта ар бири 29 кабаттан турган беш турак жай блогу салынууда. Мындан тышкары, комплекстин аймагында коомдук мейкиндиктер, жашыл зоналар жана заманбап инфраструктуралык объекттер түзүлөт.
Министр Нурдан Орунтаев курулуш иштеринин сапатын камсыздоого жана шаар куруу нормалары менен курулуш талаптарынын так сакталышына өзгөчө көңүл буруу зарылдыгын белгиледи. Ошондой эле ал өлкөдө ири курулуш долбоорлорун ишке ашыруу жана жеке инвестицияларды колдоо мамлекеттик саясаттын артыкчылыктуу багыттарынын бири экенин айтты.
