Сокулукта мыйзамсыз газ саткан 3 объект аныкталды
Чүй облусунун Сокулук районунда суюлтулган газды мыйзамсыз сатуу жана газ куюу учурунда коопсуздук талаптарын одоно бузуу фактылары аныкталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Экологиялык жана техникалык көзөмөл кызматынын текшерүүсүнүн жыйынтыгында жалпысынан үч мыйзамсыз соода түйүнү аныкталган. Алардын экөөнө калктуу конуштардын аймагында жайгаштырылган автоцистерналарды коопсуздук талаптарына ылайык аймактан чыгаруу боюнча милдеттүү көрсөтмөлөр берилди.
Ал эми дагы бир объект боюнча кошумча документтер талап кылынып, учурда мыйзам чегинде тиешелүү чараларды көрүү иштери жүргүзүлүүдө.
Адистердин айтымында, калктуу конуштардын ичинде көчмө автоунаа газ толтуруучу станцияларды жана автоцистерналарды жайгаштырууга мыйзам тарабынан тыюу салынат. Өзгөчө жай мезгилинде абанын температурасынын жогору болушу мындай объектилердин жарылуу жана өрт чыгуу коркунучун күчөтөт.
Министрлик коопсуздук талаптарынын сакталбашы адамдардын өмүрүнө жана ден соолугуна, ошондой эле айлана-чөйрөгө олуттуу зыян келтириши мүмкүн экенин эскертип, жарандарды мыйзам талаптарын так сактоого чакырат.
